Aliquatenus miror Sinenses potuisse efficere, ut duo et omnino diversa negotia de commercio cum Europæis augendo facienda in unum cogerent. Nam diurnarii nuntiant Sinenses dicere se velle permittere ut Comniacus spiritus vini, quod in Gallia paratur, intra suos fines venum daretur, dummodo Europæi sibi permitterent ut vehicula electrica in Europa venum darentur. Incommodo enim uni parti Galliae erit, si commercium Comniacum a Sericis macellis in alias gentes translatum erit; sed ex altera parte, si Sinensibus licebit vehicula pretio sic deminuto in Europa vendere, ut nemo Europæus vehiculum vel fabricari vel vendere possit, tota res raedaria ab Europaeis societatibus tolletur (quod praecipue Germanis damno erit). Quæ enim terra, nisi Comniaca ipsa, mavult potiones pro vehiculis electricis parare? In utro plus lucri futuri inest?