De variis numeris Europaeis

Cum conemur Europaeos mores, nobis barbaris semper miros et insolitos, melius intellegere, coepimus per numerorum campos vagari, unde nonnullos carpsimus flosculos mathematicos qui docerent quam viride vigerent res publicae Europaeae.

• Sunt in Italia ad 154,000 homines politicos (magistratus, senatores, urbi praefectos, et alios). Suspicamur autem in eo numero non haberi novum regimen: itaque hic numerus facile et feliciter crescere potest!
• Erant anno 2009º in Britannia modo 30,000 homines politici. Sic exercet regina Britannorum suam tyrannidem, ad popularis vocis potestatisque detrimentum.
• Militant in Italia 186,000 viri feminaeque fortes (108,000 in exercitu Italiano, 35,000 in classe navali, 43,000 in copiis aeriis), sed ille numerus austeritatis causa mox deminuetur ad 150,000, qui numerus minor est eo politicorum. Quam felicem rempublicam, in qua plures homines deliberant quam militant, et exercitus timet senatorum magistratuumque copias!
• Ad suos homines politicos alendos constat unicuique familiae Italicae 367 nummis Europaeis (sive 142€ singulis hominibus, si in unaquaque familia continentur 2.58 homines); quam iustum et aequo animo ferendum hoc parvum pretium sit facile intelligitur ex hoc: quod Italorum exercitus militaris eiusdem magnitudinis constat pretio fere duplice (politici accipiunt ad 9,000,000,000€, et exercitus ad 16,000,000,000€).
• Mira aequitate possunt scribae senatus Italorum plus pecuniae mereri quam etiam praeses totius reipublicae.
• Ad Britannorum paucos homines politicos alendos constat unicuique familiae Britannicae ad 28 nummos Europaeos (sive ad 9.29€ singulis hominibus vectigalia pendentibus—feruntur inesse in Britannorum familiis 2.4 homines). Itali igitur rationes democraticas, ut aiunt, quibus populus potestatem exercet, tredecies magis amant quam Britanni, nam Itali pecuniam tredecies ampliorem suis politicis tribuunt quam Britanni.
• Ad reginam Britannorum alendam constat unicuique familiae Britannicae 1.88 nummis Europaeis (sive 0.78€ singulis hominibus vectigalia pendentibus). Quattuordecies igitur magis amant Britanni suos politicos homines quam suam reginam.
• Ad ludos Olympicos in Britannia habendos constabit unicuique familiae Britannicae 527 nummis Europaeis (Britanni iam anno praeterito clamitabat de hoc pretio cum tantum ad 441€ staret). Unde consequitur ut Britanni ament aestivas circenses plus tricenties vehementius quam reginam ipsam. De pretio panis nihil habeo compertum.