Josephus Blatta rex ludificator non solum satellites permultos, qui fraudes pro rege egerant, nuper perdidit, sed etiam solio suo depulsus munere se abdicat. Quod nuntiatum est paulo post patefactum erat quaestores pervestigatoresque tam Americanos quam Helvetios inquirere in Hieronymum Valcke, qui fertur centies centena millia dollariorum a fisco FIFAstarum movisse in id alterius societatis pedilusoriae, ut Jacobus Warner, ab Africanis meridionalibus eo pretio conductus, remunerationem pro suo suffragio dato per ambages acciperet. Warner ille, qui magnam ex altera sociatate pecuniam (id est remunerationem, qua corruptus erat) peculatus est, in insula Trinitatis nunc opperitur, in jus Americanum adducendus. Quia Hieronymus Valcke necessarius fuit et proximus Josepho Blattæ, non multum absunt quæstores quin possint etiam hunc lucifugam de tenebroso regno pedilusorio in immisericors atque inexorabile lumen trahere justitiæ.
Quomodo res nunc sese habeant
In vinculis Helveticis tenentur Gaufridus Webb (CONCACAF), Eugenius Figueredo (CONMEBOL), Eduardus Li ex Ora Divite, Julius Rocha Nicaraguensis, Constantius Takkas olim Cæmanensis, Raphael Esquivel Venetiolanus, Josephus Maria Marin Brasilensis. Ex illis sex iam certant ne in Americam deportentur; unus vero iam consentit quo celerius trans mare Oceanum rursus in novum orbem terrarum atque in basilicam Americanam deferatur (verisimile est eum ipsum testimonium in alios oblaturum esse).
Jacobus Warner pignore dato vinculis solutus est usque ad tempus, quo in Americam transferetur; sed oportet eum certis temporis intervallis custodes adire, ne fugisse videatur.
Nicolaus Leoz Paraguensis a custodibus publicis tenetur domi propter infirmam valetudinem.
Aaron Davidson Miamensis comprehensus et Novi Eboraci reus est corruptelae; domi tenebitur vinculo electronico.
Alexander Burzaco et Hugo Marianusque Jinkis quæruntur tam a suis Argentinis quam ab Americanis necnon a pervestigoribus omnium gentium, qui INTERPOL vocantur. Josephus Margulies quoque ab INTERPOL petitur.
„Fabula“, ait Fridericus Dürrenmatt poeta Helveticus, „tum demum absoluta ac perfecta est, cum exitus quam pessimus factus est.“ Sed quoto in actu sumus hac in tragi-comoedia c.t. „FIFA2? Adhuc in prologo? An post peripeteian, quae dicitur, factam? Quid, Nemo, tibi videtur?
In theatro mundi, unusquisque histrio auctor est suae partis: nonnulli meliora argumenta, alii vero peiora sibi inveniunt. Qui ludo pedifollico praefuerunt, illos oportuit melius pro se spectatoribusque eligere: nam quasi principes fuerunt spectabiles, qui potuerunt exemplum et documentum prudentiae, dignitatis, honestatis dare pueris, quibus gaudio est ludus ille. Sperandum est fore ut futuri praefecti meliores partes sibi inveniant.
Mihi persuasum est aliud esse, cum pueri aliqui in prato viridi pedifolle ludunt, aliud, cum quidam pedilusor corio ludens teriti pecuniam haud parvam meret. Altera res innocens mihi videtur, altera idem quod aetate Romana fuit circus Maximus. Oblectamentum enim urbi et orbi destinatum quomodo insons innocensque esse valeat? Homo ludens in mercennarium mutatus – nihil quidem refert, an arte elegantissima se dedicaverit corio illo divino – perdidit innocentiam. Idem valet, ni fallor, ad pedifollicorum spectaculorum grapheokratas, magistros, imperatores.